Eustache DESCHAMPS, Balade LVIII, Le chat et les souris

Je treuve qu'entre les souris
Ot un merveilleux parlement
Contre les chas leurs ennemis,
A veoir maniere comment
Elles vesquissent seurement
Sanz demourer en tel debat ;
L'une dist lors en arguant :
Qui pendra la sonnette au chat ?

Cilz consaulz fut conclus et prins ;
Lors se partent communement.
Une souris du plat pais
Les encontre et va demandant
Qu'om a fait : lors vont respondant
Que leur ennemi seront mat :
Sonnette aront ou coul pendant.
Qui pendra la sonnette au chat ?

"C'est le plus fort," dist un rat gris.
Elle demande saigement
Par qui sera cilz fais fournis.
Lors s'en va chascune excusant ;
Il n'y ot point d'executant,
S'en va leur besogne de plat ;
Bien fut dit, mais, au demourant,
Qui pandra la sonnette au chat ?

L'ENVOY

Prince, on conseille bien souvent,
Mais on puet dire, com le rat,
Du conseil qui sa fin ne prant :
Qui pendra la sonnette au chat ?