Eustache DESCHAMPS, Balade DCCCIII

Hugues d'Ars, Garences, Rossoy,
Prunelé et vous, Florigni,
Par vous cinq trop de maulz reçoy,
Par Poitiers et par Savoisy,
Par Huet d'Angennes aussy ;
A vous ne puis durer en place.
Dès maintenant tous vous reny :
Maudy soyez de par Eustace.

L'un fiert, l'autre moque de moy,
En disant : "De savetier fy !"
L'autre ne me laisse par foy
Boire ne mengier delez lui :
Cent foyz sui le jour assailly
Tant que je ne say que je face,
Bastu, defulé et laidi :
Maudi soyez de par Eustace.

Avoir ne puis ne droit ne loy ;
A chartiers m'envoient aussi.
Tous ensemble et chascun par soy
M'avez maint mal fait ; or vous pry
Que jusques a la Saint Remi
Chascun bon sauf conduit me face,
Si non par desconfort vous dy :
Maudy soyez de par Eustace.

L'ENVOY

Princes, gens plus mauvaiz ne vy
De ceulz qui ne m'ont pas en grace.
Pour ce leur offre et ce leur di :
Maudiz soiez de par Eustace.